كتبت : زينب يحيي
يتعرض الجسم يوميا للغبار والشوائب التي تتراكم على البشرة وبتغير لون الجلد عن لونه الطبيعي وبتسيب تصبغات, ومجرد غسل الجسم بالصابون مش كافي لازالة كل السموم والشوائب المتراكمة عليه, انتي محتاجة لغسل الجسم بطريقة فعالة اكتر, وده اللي هنعرفه النهاردة من خلال تقريرنا هنوضح وصفات لتجديد بشرة الجسم وتقشيرها, بالاضافة لفوايد تانية كتير هنتعرف عليها بالتفصيل.
وصفات طبيعية لتفتيح بشرة الجسم
وصفة ملح البحر وفيتامين E:
مكونات الوصفة
2 كوباية ملح البحر.
3 معالق كبار زيت فيتامين E.
3 معالق صغيرة عسل.
كام نقطة من زيت الاطفال.
طريقة التحضير
اخلطي الملح مع زيت فيتامين E وقلبيهم مع بعض كويس, ثم ضيفي لهم العسل وزيت الاطفال, قلبي المكونات كلها لحد ما يتكون عندم معجون سلس وخشن شوية, وكده تبقى الوصفة جاهزة للاستخدام.
ملح البحر ليه خصائص مضادة للالتهابات, زيت فيتامين E يعتبر معالج للبشرة, زيت الاطفال والعسل بيساعدوا على ترطيب البشرة بشكل فعال, وبالاضافة ان الوصفة دي بتقشر الجلد وبتنضفه كمان بتعالج العلامات والندبات على البشرة اللي هتروح بالتدريج مع استخدام فيتامين E والعسل.
وصفة الملح والسكر والعسل
مكونات الوصفة
½ كوباية ملح.
½ كوباية سكر.
½ كوباية عسل.
طريقة التحضير
اخلطي كل المكونات مع بعض وقلبيها كويس حتي تصبح عجينة خشنة, واستخدميه على الجسم.
البشرة بتحتاج للتقشير باستمرار كروتين اساسي للعناية ببشرتك, وافضل طريقة للتقشير هي باستخدام مقشر, والسكر والملح بيساعدوا على ازالة الجلد الميت, والعسل هيحافظ على رطوبة الجلد.
وصفة السكر البني وزيت الجوجوبا
مكونات الوصفة
1 كوباية سكر بني.
معلقتان كبار من من زيت الجوجوبا.
½ كوباية عسل.
طريقة التحضير
اخلطي المكونات كلها مع بعض حتي تصبح عجينة خشنة, استخدميها لتقشير الجسم.
السكر البني هيساعد على ازالة خلايا الجلد الميت بشكل فعال, وزيت الجوجوبا هيحافظ على رطوبة وليونة الجلد.
وصفة الكربوناتو وزيت جوز الهند
مكونات الوصفة
½ كوباية كربوناتو.
معلقة كبيرة من زيت جوز الهند.
½ كوباية عصير ليمون.
3 نقط من زيت اللافندر.
طريقة التحضير
اخلطي المكونات كلها بعض وقلبيهم كويس, واستخدمي الوصفة على الجسم.
زيت جوز الهند غني بمضادات الاكسدة ومضادات الشيخوخة, والوصفة دي من الوصفات اللي بتساعد على علاج البشرة المتضررة من الشمس, والبشرة دايما بتكون محتاجة لفيتامين C اللي هيوفرهولك عصير الليمون, وزيت اللافندر بيساعد على تهدئة البشرة, بالاضافة انه هيدي ريحة حلوة جدا للبشرة.
وصفة السكر البني وقشر البرتقال
مكونات الوصفة
2/3 كوباية سكر بني.
½ كوباية قشر برتقان بودر “جففي قشر البرتقان في الشمس او في الفرن ثم اطحنيه”.
½ كوباية زيت زيتون.
طريقة التحضير
اخلطي المكونات وقلبيهم كويس مع بعض, استخدمي الخليط على الجسم.
قشر البرتقان بيساعد على تفتيح البشرة بشكل طبيعي, وزيت الزيتون بيساعد على ترطيب البشرة وبيزود من فاعلية اي وصفة لما بيتضاف ليها, والوصفة دي فعالة جدا لعلاج العلامات القوية على البشرة وتصبغ الجلد.
