انتشر في الاونة الاخيرة تقليد واتجاة غريب كانة اختراع للموت الحقنة تلاتة فى واحد لا هيه موجودة فى أى كتاب ولا أى مرجع إختراع فهلوة مصرى ١٠٠٪ أدى إلى مقتل العشرات واللى مستمر استخدامه من بعض المرضى ووصفه من بعض أنصاف الدكاترة و أشباه الدكاترة الإختراع اللى أدى مؤخرا برضه مفيش فايدة إلى وفاة فتاة شابة فى كلية التجارة جامعة المنصورة الحقنة القاتلة الفاشلة دى مكونه من تلات مصايب خبط لزق المصيبة الاولى هيه الفولتارين اللى ممكن يسبب نزيف لو واحد خده عنده قرحة والمصيبة التانية حقنة الكورتيزون اللى ممكن يسبب ارتفاع مفاجئ فى ضغط دم مريض ضغط ولا قلب والمصيبة التالته عشان تكون الجريمة متكاملة فى ميكس حقن قاتل هيه حقنة المضاد الحيوى من عيلة قريبة من البنسلين اللى الشعب المصرى كله عارف من اكتر من ٧٠ سنة ان البنسلين ومشتقاته وقرايبه تحديدا لا يجوز أبدا ضربه إلا بعد إختبار حساسية و فى مكان مؤهل لا قدر الله إن حصل هبوط دورة دموية بسبب تفاعل حساسية حاد جدا يتلحق على طول إحنا بنتكلم فى ٥ دقايق لأما المريض هيتوفى و ٥ دقايق دى معناها ان مفيش حقنة مضاد حيوى أبدا من عيلة البنسلين إلا ويتحقنها المريض فى مستشفى فيها رعاية مركزة غير كده دا انتحار .
أرجوك أرجوك أرجوك بلاش تعامل جسمك بعصر السرعة فى العلاج مفيش حاجة اسمها هاخد الدوا حقن عشان أخف بسرعه فيه حاجة انى اصبر على البرد واقعد ارتاح فى البيت وفيه حاجة اسمها طبيب اكشف عنده وصيدلى اصرف منه ومستشفى اتحقن فيها غير كده خد دواك اقراص ولا شراب .
البقاء لله فى شابة المنصورة وربنا يصبر اهلها وأتمنى والقرار بسيط أهوه جدا إن وزارة الصحة تنزل نشرة ببعض الأصناف ذات الخطورة المرتفعه لحدوث رد الفعل التحسسى الحاد بمنع ضربها فى أى مكان إلا بالمستشفيات أنا مبقولش الصيادلة ميدوش حقن لكن لو تلاحظو هيه حقنة واحدة اللى عمالة تموت الناس صغار وكبار حقنة واحده بقرار وزارى واحد يخلص وجع القلب ده .
ممكن لو سمحت توقف حقن السيفترياكسون اصلا وتشوف ليه بديل تانى المادة قوية جدا بس ليها بدايل كتير المادة دى نشر عنها فى إنجلترا انها قد تتسبب فى توقف القلب والرئتين لبعض المرضى وان فيه مرضى انجليز توفو بسببها ودول فى إنجلترا مابالك فى مصر عقبال مايوصل الإسعاف هتكون خلصت الحساب مع الملايكة .
