كتبت زينب يحيى
لقمة القاضي المقرمشة اللي أول ما تقطميها تسمعي القرمشة… ومن جوه طرية وخفيفة ومتشربة شربات
لو كل مرة بتعملي لقمة القاضي وتطلع معاكي طرية زيادة أو بتشرب زيت، جربي الطريقة دي وركزي في أسرار القلي والشربات
مكونات العجينة:
- 2 كوب دقيق
- 2 ملعقة كبيرة نشا
- ملعقة كبيرة خميرة فورية
- ملعقة كبيرة سكر
- رشة ملح
- حوالي 1 وربع كوب ماء دافي «حسب احتياج الدقيق
للشربات:
- 2 كوب سكر
- كوب ماء
- ملعقة كبيرة عصير ليمون
- فانيليا اختياري
الطريقة:
- حطي السكر والمياه على النار، ولما يبدأ يغلي ضيفي عصير الليمون وسيبيه حوالي 8–10 دقايق، وبعدها ارفعيه وسيبيه يبرد تمامًا.
- في بولة حطي الدقيق والنشا والخميرة والسكر ورشة الملح، وبعدها ضيفي المياه الدافية بالتدريج مع التقليب.
- اخلطي كويس لحد ما تحصلي على عجينة لينة ولزجة وناعمة، مش عجينة متماسكة زي عجينة العيش.
- غطي البولة وسيبي العجينة تخمر حوالي 45–60 دقيقة لحد ما حجمها يزيد وتظهر فيها فقاعات.
- سخني زيت غزير على نار متوسطة، وبمعلقة صغيرة مدهونة زيت خدي من العجينة وانزلي كور صغيرة في الزيت.
- عشان تبقي ذهبية ومقرمشة، طلعيها من الزيت وصفيها، وبعدها نزليها وهي سخنة في الشربات البارد لوقت قصير وطلعيها.
